一支公小記 @.@

係好耐,好耐以前,有一個小公主寄託在一支公的家.大大的眼睛,尖尖的瓜子臉,白白的膚色.真像童話故事中的女主角(如果肯乖乖坐著的話).可惜,絕大部分時間,她比較喜歡做一隻甩繩馬騮.東跳西躍,大床,沙發全是她的兒童樂園.

 

要令馬騮變回公主的魔法,就是雞蛋仔.毎次見到雞蛋仔,公主就會現出甜甜的微笑.令你無可反抗地將貢品奉上.當然,魔法用完(雞蛋仔食晒)時,公主又會變回馬騮.令你哭笑不得.記得,當時雞蛋仔還是街頭小食,所謂街頭小食,就是要係某個街頭的小販先有得賣,還是用碳爐燒的(真係好食D嫁).唔似得今日成行成市.但為有時博公主一笑,放學後的一支公也會跑個老遠買回來.回到家中,小公主聞到香噴噴,同見到一支公手中的黃色紙袋.就會笑笑口用D不係太正的廣東話問:[乜來嫁?].總管一支公無情的答[無呀!],但最後還是讓她得程.

 

雖然公主有時有公主皮氣(比小姐皮氣還高一級),但相處的日子裏,總帶比一支公一家歡樂.有時公主會用係幼稚園學的英文同你打朝呼,到現一支公還記得佢果句:[May I go to toilet?].^^!

 

後來,她一家移民到外國,輾轉又到另一個地方居住.現在已經很少見面.但每次見到雞蛋仔,也會記起當年的小公主呢.

 

時間真是很快,以前的那個頑皮小公主,轉眼間已經上了大學,還拍了拖,真係做了某男生心裏的公主.祝褔她像童話主角一樣,以後過住D幸褔快樂o既生活啦. 

為了騰出空間放置即將來臨的新玩具(係乜?嘿嘿…),今日用上半天時間,在家小掃除.毎次執拾,都像將自己過去的影像,重新執拾一次.今次執了很多出來工作以來,留下的東西.有以前出差買的數碼相機(一百五十萬像素,嘩嘩嘩…實力直迫我上一部的手機,當年機皇,唉…歲月不饒人.),同事送的羽毛球袋(真慚愧,收了個袋後,已經金盆洗手,未用過.)和毛公仔(???!!!,點解!點解係毛公仔!死,真係唔記得o左!算啦,都幾得意.).意外驚喜是發現一疊(係一大疊)已經遺忘了的郵票,記得初初出來工作的一兩年,還有集郵的習慣.唔覺唔覺都有十年了.唔知現在值多少,夠唔夠比首期呢(發夢中).

 

執拾時,惱海不停閃出毎份工作的片段.有過收入豐厚的黃金時代,也有過差D沒錢交稅的苦日子.試過創業,亦試過失業.由大起大落的從前,回歸到平平淡淡的現在.未來又會如何呢?

 

回首過去,百感交集.但毎次執拾最深刻的感覺還是…

(閱讀全文)

前日,一支公做一個壞孩子應該做的事 - 走堂.自己一支公去o左睇黃子華的棟篤笑(壞孩子o既路果然係孤獨o既).

一支公一直係子華兄的fan,家中珍藏他一套棟篤笑的VCD.得閒總愛攞番出來重温,培養一o下個人品味.之前聽過睇o左的朋友說不錯,一早已經心癢癢.加上公司離佢表演場地超近(行都唔使三個字).衝動的一支公當然係受不住誘惑啦.

當你還可以用錢,買到快樂時,應該毫猶豫地將它買下來.因為你慢慢發覺這些東西會越來越少.以前錢買到TV game,就可以樂一陣子,但對TV game 漸漸失去興趣的一支公來說,這方法越來越不行了.當然,錢更加買唔到愛情,買唔到妳番黎我身邊(如果可以的話,一支公走去揾”安信兄弟”唱o下情與義又有乜所謂).所以,唔係好多快樂可以用錢買到,當你幸褔地遇到的話,好應該買下來.及時行樂,係某個角度來說,都係好o岩o既道理.呵呵…有時候幫自己揾個籍口,都係好o岩o既.

好似講o左好遠咁,講返做回反叛青年的一支公,放o左工,當然背著書包,去麥當當買番個包啦.(正!同以前一樣,只係差了套校服.).跟住先好潚灑咁彈彈o下去睇show.

走到賣飛個counter 度.

[唔該,仲有無飛賣呀?]
[得番單人飛乍喎?]
[唉,比一張我啦,個位盡靚唔該.]帶著唏噓的一支公答.
[200蚊啦,多謝!]counter 阿伯帶著同情的微笑送上入場卷.

四周圍hey o左一陣,就入場,阿伯果然識做,個位雖然唔係正面,但都算十分近個台.臨時買的,都算不錯了.

子華兄出場了,一支公同其他fans 一樣,用最老友的方式歡迎他,掌聲和大十倍的噓聲.今次沒有用政治人物講笑.反而講盡社會的各種人生百態,由老細同打工仔講到男同女.內容仍然有趣,說話仍然抵死.加上子華兄鬼馬的表情同語氣.全場氣紛高漲,有時尖叫,有時大笑,有時講埋一份,吋o下佢,比佢吋番.大家輕輕鬆鬆,開開心心過了兩粒鐘.

今次雖然唔係佢最好的一次的棟篤笑,但對餓了很久的一支公來說,已經很滿足了.

以下是英文翻譯版


(閱讀全文)

前幾天上完英文course 回家,忽然眼前一亮(好彩唔係眼前一黑o者,唔係的話,一支公小記變一支公傳記就大件事囉,彩!!).原來班上一位同學仔,竟然係同一個火車站出現,仲要係屋企樓下果個.因為佢講緊電話,所以一支公也識趣地,没有打擾.

但心裏面有一個感覺.住在這裏都有一段時間,為什麼之前沒有遇見佢呢?其實,或者大家已經遇上千萬次,但都只是擦身而過,沒有留下印象吧.

毎天,來來回回,重重複複的毎張既陌生又熟悉的面孔,原來只差一點點.

一點點相識的運氣…

最近一支公迷上攝影,前一天和公司裏兩個志同道合,臭味相投的同事.放工後,到尖沙咀影相.飛快的食過晚飯,便坐天星小輪過海,平時坐船總是一個人如老餅般享受博殺(工作)後的寧靜.今日卻像要去遊樂場的興奮小孩.係船度,又試機又吹水,要點影點影.哈哈…回復青春好過用SK II.

下了船,一陣陣涼風吹來,正爆!!!上次影時還是熱到身水身汗呢.set 了腳架,乜都影一餐,因為維港影得太多,有點厭.所以主力影其他.影完鐘樓附近,走向星光大道,剛剛今年是哥哥（張國榮）五十歲。那裏有一個他一生的展覽，一邊影相，一邊漫步，一邊回看他的一生，那裏還播著他的歌呢，伴著微涼的秋風，很舒服。一支公有幸成長於娛樂圈的黃金時代。最好聽的歌，最好看的戲。都聽過，睇過。聽番那時歌，回想當年。很懷念呢。唔覺唔覺哥哥、妹姐都走了幾年。願他們在天國快樂啦。

快樂時間過得特別快，點知粒電用得仲快。不知不覺三條友的相機，差唔多無晒電。今次夜攝老尖大行動，就咁樣結束。

小弟的攝影技術，只有Level One。希望各位高手多見諒。
http://fotologue.jp/ariesng



(閱讀全文)

唔覺唔覺,部老爺電腦已經跟了一支公三四年.最近唔知點解開唔到機.細看之下,發現個開關掣爛了.因為太舊款換不到,但如果因為個開關掣換成部腦,又覺得唔值又唔環保(哈哈…孤寒就真),不境只是用來上網,部腦夠用有餘.

結果,一支公把心一橫,成個開關掣拆出來,只剩兩條電線.開機時,兩線一疊,就”逹”著部機,再疊耐D就可關機.現在毎次開機關機時,總有點偷車感覺.哈哈…^^

希望頂得一陣得一陣啦.雖然作為IT人,這樣有D寒酸(都唔係有D,都幾寒o下).算啦,又無人知.呵呵.錢同面子,還是錢可愛一點.等將來靚靚公主要家訪時,先買過部型仔機啦.

P.S.這樣做,燒機機會極高.閣下除非山窮水盡或想換過部腦.勿試!!!!

 

 

隔了二個月,讀了一半的英文又開課了.因為要幫公司同事解決問題,八點半才離開公司(聽講個course 係六點九開始.哈哈…又遲到(^^)\).忽忽跑去課室,正如所料,奇積沒有發生,課室內已經沒有妳的身影.人少了,課室也細了.同阿sir 講了sorry, I am late.就坐下,可能已經遲一大半啦,好似上了一陣就落堂.

下課後,同同學仔話別後,自己一個人走到曾經同妳一起食飯的茶餐廳,坐在上次和妳一起的枱上(好彩剛剛沒人坐o者,一陣明明成層大把吉枱,仲走去等位,一支公實在攞唔出咁大勇氣!).點了妳喜歡食的咸牛肉潛艇,記得妳唔食洋蔥,試o下叫佢走蔥,睇o下睇得唔得先(下次同妳叫果陣,叫走蔥,先知唔得,一定菸爆.哈哈…不過應該沒有下次了).點知個待應話咁夜可能潛艇賣晒…o下,唔止走蔥,連成隻潛艇走埋…點萛…點算.好彩最後待應話仲有,總算放下心頭大石.因為減緊肥,本來叫檸賓(竟然賣晒!!!),出人意表地叫了好納克.點完菜後,回想上次片段,想o下想o下,呀…好似有D悶.於是拿起最近心愛的nds 打了一陣.食物終於來了,不過隻潛艇好似中了數十枝導彈一樣燶晒.算啦…反正點都覺得無妳一齊食咁好味.一個人食飯點會好食呀…

出了茶餐廳,走在送妳搭車的路,上次和妳一起走時,腦內一片空白,唔知自己講緊乜,詞不逹意,我想一定是好怪和悶親你了(對不起!).和上次一樣,這段路總希望可以長一D(如果有妳,最好沒完沒了).但始終到了盡頭,只好沿上次的路回家.這晚的妳又在做什麼?和友人食飯,還是在上另一個course呢?

已經不想再打擾妳了,或者這是一支公可以為你做最好的事.隨著時間,send給妳的電郵記錄,已經一個一個被電腦刪除,好像告訴一支公,和妳的線也一條條的斷了.這夜沒有太多的傷感,只有想念.願妳一切安好.