最近一支公迷上攝影,前一天和公司裏兩個志同道合,臭味相投的同事.放工後,到尖沙咀影相.飛快的食過晚飯,便坐天星小輪過海,平時坐船總是一個人如老餅般享受博殺(工作)後的寧靜.今日卻像要去遊樂場的興奮小孩.係船度,又試機又吹水,要點影點影.哈哈…回復青春好過用SK II.
下了船,一陣陣涼風吹來,正爆!!!上次影時還是熱到身水身汗呢.set 了腳架,乜都影一餐,因為維港影得太多,有點厭.所以主力影其他.影完鐘樓附近,走向星光大道,剛剛今年是哥哥（張國榮）五十歲。那裏有一個他一生的展覽，一邊影相，一邊漫步，一邊回看他的一生，那裏還播著他的歌呢，伴著微涼的秋風，很舒服。一支公有幸成長於娛樂圈的黃金時代。最好聽的歌，最好看的戲。都聽過，睇過。聽番那時歌，回想當年。很懷念呢。唔覺唔覺哥哥、妹姐都走了幾年。願他們在天國快樂啦。
快樂時間過得特別快，點知粒電用得仲快。不知不覺三條友的相機，差唔多無晒電。今次夜攝老尖大行動，就咁樣結束。
小弟的攝影技術，只有Level One。希望各位高手多見諒。
http://fotologue.jp/ariesng
(閱讀全文)
某天.
[老細,D牛丸幾錢串呀?]
[十蚊十粒]
[咁魚蛋呢?]
[十蚊八粒]
[點解魚蛋仲貴過D牛丸o既?]
忽然,個小販放低篤緊o既魚蛋,抬頭,45度望向天空,輕嘆一聲.道:
[正所謂牛丸誠可貴,魚蛋價更高.]
[死!咁深o既,唔明添!]一支公心忖,只有硬頭皮回道:
[問世間情為何物,燒賣又點賣呢?]
[燒賣,賣晒!]
[嘩,潚灑,簡單,明晒,呢個小販真係收放自如,高人.]一支公話在心頭.
[咁比十蚊牛丸我啦]
接過牛丸,潚灑地轉身,走了幾步,呼呼風聲中,依稀聽到電話中.
[老婆,D過期牛丸終於賣晒,今晚唔使再食,斬多件义燒返黎!]
唔覺唔覺,部老爺電腦已經跟了一支公三四年.最近唔知點解開唔到機.細看之下,發現個開關掣爛了.因為太舊款換不到,但如果因為個開關掣換成部腦,又覺得唔值又唔環保(哈哈…孤寒就真),不境只是用來上網,部腦夠用有餘.
結果,一支公把心一橫,成個開關掣拆出來,只剩兩條電線.開機時,兩線一疊,就”逹”著部機,再疊耐D就可關機.現在毎次開機關機時,總有點偷車感覺.哈哈…^^
希望頂得一陣得一陣啦.雖然作為IT人,這樣有D寒酸(都唔係有D,都幾寒o下).算啦,又無人知.呵呵.錢同面子,還是錢可愛一點.等將來靚靚公主要家訪時,先買過部型仔機啦.
P.S.這樣做,燒機機會極高.閣下除非山窮水盡或想換過部腦.勿試!!!!
奶茶一直都是一支公的最愛,以前最多試過一日幾杯.想不到年紀大,還是什麼原因.現在喝多過一杯,個胃就頂住頂住,同心跳(當然唔係見到靚女種啦),好不舒服.現在明白到原來有quota 的,現在限住自己毎日最多一杯,因為害怕一日真係爆o左 quota, 連一杯都飲唔到,又少一樣人生樂趣.
除了奶茶,還有很多野都係一樣,如TV game,以前日打夜打,從不厭倦.現在已經很難提起勁勁打了(但還是會打的…嘻嘻).不是現在D game 弱,似是自己已經沒有當年的心境,沒法完全領會過中樂趣.也許Quota 用得差不多吧!
但願自己的愛情Quota 還未用盡啦(都無乜點用過,唔係咁對我呀!).唔…還是趁還有Quota 時,珍惜毎次緣份,好好的談毎一次戀愛.
隔了二個月,讀了一半的英文又開課了.因為要幫公司同事解決問題,八點半才離開公司(聽講個course 係六點九開始.哈哈…又遲到(^^)\).忽忽跑去課室,正如所料,奇積沒有發生,課室內已經沒有妳的身影.人少了,課室也細了.同阿sir 講了sorry, I am late.就坐下,可能已經遲一大半啦,好似上了一陣就落堂.
下課後,同同學仔話別後,自己一個人走到曾經同妳一起食飯的茶餐廳,坐在上次和妳一起的枱上(好彩剛剛沒人坐o者,一陣明明成層大把吉枱,仲走去等位,一支公實在攞唔出咁大勇氣!).點了妳喜歡食的咸牛肉潛艇,記得妳唔食洋蔥,試o下叫佢走蔥,睇o下睇得唔得先(下次同妳叫果陣,叫走蔥,先知唔得,一定菸爆.哈哈…不過應該沒有下次了).點知個待應話咁夜可能潛艇賣晒…o下,唔止走蔥,連成隻潛艇走埋…點萛…點算.好彩最後待應話仲有,總算放下心頭大石.因為減緊肥,本來叫檸賓(竟然賣晒!!!),出人意表地叫了好納克.點完菜後,回想上次片段,想o下想o下,呀…好似有D悶.於是拿起最近心愛的nds 打了一陣.食物終於來了,不過隻潛艇好似中了數十枝導彈一樣燶晒.算啦…反正點都覺得無妳一齊食咁好味.一個人食飯點會好食呀…
出了茶餐廳,走在送妳搭車的路,上次和妳一起走時,腦內一片空白,唔知自己講緊乜,詞不逹意,我想一定是好怪和悶親你了(對不起!).和上次一樣,這段路總希望可以長一D(如果有妳,最好沒完沒了).但始終到了盡頭,只好沿上次的路回家.這晚的妳又在做什麼?和友人食飯,還是在上另一個course呢?
已經不想再打擾妳了,或者這是一支公可以為你做最好的事.隨著時間,send給妳的電郵記錄,已經一個一個被電腦刪除,好像告訴一支公,和妳的線也一條條的斷了.這夜沒有太多的傷感,只有想念.願妳一切安好.
喜歡食的人,通常都很多朋友.一支公也算不例外啦^^.各種朋友都有一點,而且分別都很大.有些衣食無懮,錢好像從來都不是問題.像活在天堂中.但又有一些朋友毎天為生活奔波,為明天苦惱.一支公穿梭他們之間,就像一個凡人,飛不進天堂,也掉不落地獄.
最近正為工作上的事煩惱(繼續留在這崛頭路上,還是冒險的離開.),一直也找不到答案.當想留在這崛頭路靜待機會時(最多離開時付出昂貴代價),天堂的朋友會告訴你,又有一個條件差過你的人,找出份好工喇.出來博一博啦.但當有雄心壯志時,又會有朋友告訴你,某某又被炒.好像叫你安份一點,知足一點.就係咁,不斷重重複複.好折磨.一個渴望飛進天堂,又害怕掉落地獄的凡人.可以點做呢?此刻的一支公,沒有答案,只有迷惘.
(2)