一支公小記 @.@

昨夜在電視中,一支公見到在舊居樓下以前成日幫襯的快餐店.童年至青少年的種種立即湧上心頭,記得一支公讀小學果陣,毎逢測驗考試,都必定去果間快餐店,叫個
煎雙蛋加條腸.希望可以有奇積出現攞到一百分.奇積當然無出現啦.各位小朋友,呢個故事話比你地聽,只叫個煎雙蛋加條腸做早餐,係攞唔到一百分o既.起碼
加多杯奶茶先得,哈哈…講笑o者,想攞一百分,當然係要讀書啦, 腸仔雙蛋呢D野信唔過.

話時話,果間快餐店D野真係唔錯(一支仲有幫襯果陣,現在唔多清楚),一支公最鐘意佢o既咖哩飯,又香又濃,係第二度食唔到果種口味,係好多個無人約o既星期六日,都唔知食o左幾多個落肚,咖哩飯,一支公好掛住你啊.

已從搬出舊居後,已經無幫襯差不多五年多了.在電視看到它的裝修没有大變,但已經改了名,可能轉了手吧.一支公以前住的屋村也變了很多,以前的酒樓變了安老院,以前的文具舖也不在了.以前滿是小朋友的屋村,現在成了老人村.冷冷清清的,總有點令人傷感.

人越大,就覺時間過得越快.好多人同事,轉眼間就變得人面目全非.時間先生,請你不要走得那麼急,那麼快,好嗎?好讓一支公和逝去中的故人舊物相聚多一點時間.最多我請你食飯丫.

如果搞一個叮噹最受歡迎法寶選舉,隨意門一定係大熱.因為佢有一群忠實過唔忠實o既fans.例如:

貪睡的人 : 只要有o左這樣的好東西,返九點,八點十起身都無問題.爽!!

成日要出trip 的人 : 早上係巴黎開會,晚上可以返屋企食飯.連佢D老婆仔女都投佢一票啦!

無錢又想旅行的人 :  唔使錢就可以週圍去,正! 有錢果D,通常大把錢同時間,唔晒D就唔過癮,所以隨意門對佢地作用不大.

師奶 : 可以隨時隨地去到老公果度,check 住佢,仲有得作怪?!

以上只係隨意門fans 的冰山一角.你話佢係唔係win 硬.

記得,小萱(范曉萱)有一隻歌:[…走進隨意門,如果真的可以,我要永遠和你住在那段回憶裡…],如果一支公也有一對隨意門,一支公也想回到可以同靚女一起那段回憶裏,然後燒o左對門,永永遠遠留在那裏.在現今的紅塵俗世中浮沈漂泊,一支公好倦.

今日一支公有個interview,本來想低調D,唔想太招搖,所以是換上一件較像樣的恤衫同皮鞋,連領帶都無打(諗住臨見工先打).點知,一見到老細,
佢就話:[做乜今日咁靚仔呀?].一支公當堂嚇到魂魄飛到三十呎外,為o左追番個魂魄同避開尷尬問題(因為唔識答).一支公只係笑住咁講:[嗯嗯…係呀…
哈哈.].老細都未及反應,一支公就飛退出三十呎外.唉…都只怪平時返工果副賊樣.

之後,一切順利.話咁快就收工.因為見工地點好近,近到就係樓上.真係講到唔信(注意:我係有權講的,而你亦有權唔信.).更不可思議的,見工的地點,原
來係一支公上一份工的地方.不過係唔同公司.內情比較復雜,及與本篇主題無關,所以省去(主因係一支公好眼訓,想快D收筆.嘿嘿!).故地重遊,人面全
非.總有一番感慨.原因都係比較復雜,及與本篇主題無關,所以都省去.(主因都係一支公好眼訓,想快D收筆.嘿嘿!)

一早知道interviewer係外國人,而一支公的英文水平同水平線相差不遠.(都係咁水,都係咁平.),幸得高人指點,其實同外國人講英文唔係太難,
只要你冷靜,慢慢講.佢多數都明你講乜.你要明白一點,說話的目的,係人地聽得晒你講o既野,唔係你自己講晒自己要講o既野.當你像機關槍咁講完後,見到
人地咁樣.多數唔係代表你講得好,更加唔係因為你靚仔.尤其你用緊同你唔係好熟o既語言.(真正原因係乜,你自己諗o下啦!,如果你堅持話係因為你講得好或係你生得靚仔,咁你又有你o既自由o既.).唔需要怕,外國人一般比較nice,唔理你講得好唔好,有無point,都會話good,good,verygood.今次呢個interviewer都
好nice,於是同一支公good,good,verygood咁講o左成個鐘.可惜份工,一支公唔係太鐘意,真係好工難求.睇黎還有一段長路要走呢.

早一點搵工有一個好處,就係會知道自己欠缺什麼.一支公英文始終需要進步,希望下一個月上果個course,會幫一支公升o下level啦.

一樣的面孔,一樣的服飾,不一樣的表情.
一個指天篤地,一個闊佬懶理.
一個笑面迎人,一個淚流滿面.
四眼碌碌,古靈精怪.
同一車上,兩顆無塵的心.
樂極…

毎逢新年來臨,電視台都會訪問，果年第一個出生BB的父母(因為BB通常唔多鐘意接受訪問，佢地比較鐘意訓。)。毎次訪問的必答題，[唔，你地希望第日
BB點樣呀?]，而父母的必定會答：[哈哈，佢第日健健康康就得囉。]。筆者相信唔止果年第一個出生BB的父母係咁諗，天下大多數父母都係咁諗。而且多數
都如願以償。但慢慢當孩子長大，他們希望又會慢慢改變，希望佢讀書聰明，希望佢考入大學，希望佢搵到份好工，希望佢搵到個好老婆，希望太多，難免有失望，
唔知道佢地想起BB出世時，佢地o既最初o既希望，會唔會開心番呢?起碼佢地個ＢＢ今日都可以牛高馬大咁企係度。

隨著時間流逝，人o既希望都會不斷改變。

熱血青年，初初出來工作，總希望可以見識多Ｄ，所以成日轉工。後來先發覺工轉得太多，好易頭暈。穏定發展先係最重要。

青春少艾，初初談情說愛，總希望可以多姿多彩，所以成日轉晝。後來先發覺晝轉得太多，好易眼花。一張舒服床舖就足夠。

希望變得太多，會好易迷失。初初只希望家人活得富足快樂，所以努力搵錢，當有少少錢後，希望多架車，不如多層樓仲好。結果只顧搵錢，家人活得不快樂。自己也不快樂。最後先發覺自己最需要給家人多一點時間，不是多一點家用。

一支公讀書時就一直有個希望，就是希望自己鐘意o既人，唔需要為一個幾亳而煩惱。聽說有錢人o既世界好美麗，一支公希望鐘意o既人活係一個美麗世界裏。因為一直未追到鐘意o既人，呢個希望都未搞掂。邊有第二個？

但如果呢個希望成真，一支公會唔會因為貪多幾個希望，而迷失本性，走火入魔呢？唔唔。。。都係信自己唔過。所以寫篇野係度，希望第日迷失本性，走火入魔o既一支公睇到，可以回頭是岸。

年少時,牽著妳的手,感受著大家急速的心跳,憧憬著幸褔的將來.
年壯時,與妳執著孩子的手,教他健康成長,編織著快樂的現在.
年老時,携著手扙,帶妳到世界某處,細味著美滿的過去.

簡單心願,何時成真?

對於一個已經放低支筆十幾年,識字唔多的一支公來說,有一個地方自己可以寫得過癮,人地睇得開心.已經好滿足.得到讀者回應更是不可奢想的bonus.所
以一支公唔會因為無人回應悶悶不樂,鬱鬱不歡.更不會因為這樣而放棄寫野.就好似追靚女一樣,可能任你出盡渾身解數,火圈跳盡,她都好似無乜反應.難度你
會放棄嗎?像色狠一樣的一支公一定不會.因為追求的過程已經十分有趣,所以一支公一定會用加倍o既誠意同真心打動佢,直到一日她同一支公講:[你好煩呀,
收手啦…唔係打鑊你.]或者一支公遇見另一個更靚的.好彩,仲未有人對一支公講:[你好煩呀,收筆啦…唔係打鑊你.](就算有,筆者都會第一時間,
deleteo左佢,嘿嘿!)

同追女仔一樣,寫作的過程都好有趣.

其實一篇好的文章,不一定有許多回應.例如,筆者見到一篇寫清晨時在東京街頭漫步的文章,寫得浪漫詩意.難度筆者用一篇早晨與阿婆阿公係屋企樓下公園晨運的文章做回應嗎?咁樣不但好搞笑,仲煞風景.

唔回應,並唔代表唔欣賞.

多人回應的文章,多數是寫一些容易引起共鳴的題材.例如

1.)寫一些有關食的文章,會得到許多好食的人(如一支公)共鳴.
2.)寫一些有關靚女的文章,會得到許多好色的人(如一支公)共鳴.
3.)寫一些有關美容的文章,會得到許多好美的人(如一支公的靚靚網友)共鳴.
4.)寫一些有關愛情的文章,會得到許多有情人(無一支公份,嗚嗚 …><...)共鳴.

當然自己寫的東西得到多人共鳴是一件開心的事,但不需要看得太重要.你又不是靠寫文章搵食的專欄作家.可以隨心舒發,分享自己覺得好的東西,是許多人鐘意寫網誌的原因.因為這樣寫作先有樂趣.

好,又係時候講番D正經野嘞.得唔得到其他人麻甩佬共鳴,who care !!.但靚女,妳知道嗎?幾時到妳的共鳴.卻是一件令一支公牽腸掛肚的大事啊!